Спартакиадада топ жарған командалар марапатталды

Салтанатты жиында сөз сөйлеген «АМӨЗ» ЖШС Бас директоры Қуаныш Бишімов спортшыларды жеңістерімен құттықтап, зауыт қызметкерлері арасында салауатты өмір салтын насихаттап, ұжымдық ауызбіршілікті нығайтуға қосқан үлестері үшін алғыс айтты.

Талас пен тартысқа толы дода нәтижесінде әйелдер арасында жалпыкомандалық есепте III орынды орталық сынақ зертханасының командасы иеленді. Ал ерлер арасында III орынға гидрогенизациялық процестер өндірісінің қызметкерлері тұрақтады.

Жүлделі II орынды зауыт басқармасы мен орталық аппарат командасының әйелдер құрамасы, сондай-ақ кокс және күкірт өндірісінің ерлер ұжымы еншіледі.

Әйелдер арасында жалпыкомандалық есепте I орынды Жылу және электр энергиясы өндірісі, ал ерлер арасында хош иісті көмірсутектер өндірісі жеңіп алды.

Жүлделі болған командаларға арнайы кубоктар мен ақшалай сыйақылар табысталды.

Спорттық доданы жоғары деңгейде ұйымдастыруға белсенді қатысқан Максим Успанов, Данияр Черкешбаев, Қанат Мусин, Құрманғазы Сұлтангереев пен Бақытжан Успанов зауыт басшысының алғыс хатымен марапатталды.

Еске сала кетейік, 2025 жылдың мамыр айында өткен спартакиада кәсіпорын тарихындағы ең ауқымды шараның біріне айналды. Спорттың 12 түрінен өткен аламанда 700-ден астам қызметкер өзара бақ сынады. Олар спорттық рухы мен жеңіске деген жігерін дәлелдеп қана қоймай, берік корпоративтік мәдениеттің жарқын үлгісін көрсетті.


«АМӨЗ» ЖШС баспасөз қызметі