Ұрпақтар сабақтастығының дәнекері

Ильяс Қалмурзиевтің әкесі Жақсылық Қалмурзиев бар өмірін мұнай өңдеу зауытына арнаған жан. Кәсіпорынның екінші цехында табан аудармастан бірнеше ондаған жылдар слесарь болып жұмыс жасады. Айналасына жайдары, жасымен де кәрімен де тіл табысқыш адам болған екен. Балаларын еңбекқорлыққа тәрбиеледі. Ол батырып ештеңе айтпаса да, қарапайым еңбек адамының құрметті екенін, ел алдында беделді екенін ұқтыратын. Зейнет жасына жақындағанда алдымен әкесі Ильястың ағасы Сайынды зауытқа әкеп жұмысқа тұрғызады. Одан соң, 18 жасқа толысымен өзін де зауытқа әкелді. Дәнекерлеуші мамандығы бар оған шаруа жетіп артылатын. Шаршаған жоқ, жұмысын тыңғылықты атқарды. Темір екеш темірге жан бітіретін майталман болып қалыптасты. Қолына алған істі тындырмай тыншымайтын. Осының арқасында ұжымына сыйлы болды, басшылықтан талай марапаттаулар алды. Марапатқа масайған емес, Ильяс Қалмурзиев қарапайымдылығымен, еңбекке құштарлығымен жастарды осы кәсіпке тарта білді. Әрине, жұмысы қауіп-қатерге толы. Дегенмен, өз мамандығыма деген жауапкершілік арқасында әр істе бойымды үрейден, қорқыныштан аулақ ұстап, сабырлы болуға тырысамын, — дейді ол. Қай мамандықтың та оңайы жоқ. Әрқайсысының да өзіне тән бейнеті мен зейнеті бар. Сол себепті  де алдына келетін жастардың мамандық таңдауда әбден ойланып, қолынан келетін істің тізгінін ұстағанын қалайды. Ол біз әңгімелескен 15-20 минуттың ішінде жұмысынан қол үзген жоқ. Жұмысын тындыра жүріп сұрағымызға жауап береді. Дәнекерлеуші аппаратын ұқыптылықпен пайдаланады. Қауіпсіздік ережесін де қатаң сақтайтыны көрініп-ақ тұр. Оны сан жылдар бойғы дағдыдан деп түсіндік.
    «- 40 жылдан астам уақыт өтіпті, зауытқа жұмысқа келгелі. Зымырап өте шыққан уақыт-ай... 60 жасқа келгенімді ұжымдастарым, зауыттықтар елеп, ескеріп жатыр. Мерейтойлық жасқа шыққанымды да білмей қалыппын. Былай қарағанда осы зауытпен жасасып келе жатқандаймын. Бүгінде ескі зауыт жаңғырып, жаңа өндірістер ашылып жатыр. Оның құрылысына, темір бұйымыдарын дәнекерлеуге біздің мамандық қашанда сұраныста. Сондықтан да барымды салып қызмет ете бермекпін»,-дейді майталман.
     Айтқандай, Ильяс Қалмурзиев жастайынан спортты жанына серік еткен жан. Стол теннисімен айналысуға әлі күнге дейін аптасына екі күнін арнайды. Ұжымға қосылған жастарды да қасына алуды ұмытқан емес. Стол теннисімен қатар, шахмат-дойбыдан да бақ сынап жүр. Жуырда ардагерлер арасындағы дойбыдан облыстық сайыста екінші жүлделі орынды иеленді. «ҚазМұнайГаз-өңдеу-маркетинг» АҚ ұйымдастыратын дәстүрлі «Ақ Бұлақ» сауықтыру орталығындағы спорттық сайыстарға дойбыдан қатысып жүр.
   Мерейгер Ильяс Қалмурзиев зайыбы Зарипа Қалмурзиевамен екі қыз тәрбиелеп өсірді, ұзатты. Бүгінде олар бір-бір шаңырақты ұстап, түтінін түтетіп отыр.  Осылайша, И.Қалмұрзиев ерінбей еңбек қылғанның қашанда несібесі мол болмақ екенін дәлелдеген жан…