Руслан ЖҰМАХМЕТОВ, мұнайды тасымалдау цехының аға операторы

2013 жылғы 13 сәуір. Руслан зауытқа алғаш жұмысқа келген күнін әлі ұмытқан жоқ. Сол күні төртінші разрядты машинист болып еңбек жолын бастаған жас маманды ұжым жылы қабылдап, жаңа ортаға бейімделуіне көмектесті. Алғашқы міндеттер, тәжірибелі әріптестердің ақыл-кеңесі, өндірістің тәртібін үйрену – бәрі де оның маман ретінде қалыптасуына негіз болды. «Ұжым мені жақсы қабылдап, жұмысқа бейімделуіме көмектесті. Мамандықтың қыр-сырын тәжірибелі әріптестерімнен және тәлімгерлерімнен үйрендім. Үлкендердің тәжірибесін тыңдап, әр нәрсеге жауапкершілікпен қараудың маңызын түсіндім», – дейді Руслан.

Мұнай саласына деген қызығушылық оны осы ортаға әкелсе, кәсібін меңгеруге деген талпыныс алға жетеледі. Машинист қызметінде тәжірибе жинаған Руслан кейін оператор болып жұмыс істеді. Біліктілігін арттырып, аға оператор деңгейіне көтерілді. Бұл жолдың әр кезеңінде үйрену, еңбектену және өзіне жүктелген міндетті адал атқару тұрды. Бүгінде ол мұнайды тасымалдаумен айналысатын цехтың шикізат паркінде еңбек етеді. Мұндағы негізгі міндет – мұнайды қажетті қондырғыларға қауіпсіз әрі үздіксіз жеткізу, мұнай өнімдерін сақтау резервуарларына қабылдау. Сондай-ақ сорғылар арқылы мұнайды автомобиль және теміржол цистерналарын тиеу-түсіру қондырғыларына айдау жұмыстары атқарылады. Қарапайым оқырман үшін бұл бірнеше сөйлеммен сипатталатын жұмыс болғанымен, оның артында тұтас ауысымның зейіні мен үйлесімді әрекеті жатыр. Русланның жұмыс күні алдыңғы ауысымнан ақпарат қабылдап, жабдықтардың жағдайымен танысудан басталады. Одан кейін технологиялық процестерді бақылау, сорғылар мен өзге де жабдықтардың дұрыс жұмыс істеуін қадағалаумен жалғасады. Ауысым соңында атқарылған жұмыстар мен өндірістің ағымдағы жағдайы туралы мәлімет келесі ауысымға беріледі. Осылайша бір ұжымның еңбегін екіншісі жалғастырады.

Руслан үшін мұндай жұмыста асығыстыққа жол жоқ. Әр істі мұқият орындау, қауіпсіздік талаптарын сақтау және тәртіпке бағыну – тәжірибемен бекіген ұстаным. Аға оператор ретіндегі жауапкершілігін де ол осы талаптармен байланыстырады. Өндірісте жеке адамның біліктілігімен бірге әріптестердің бір-біріне сенуі де маңызды. Әр қызметкер өз міндетін дұрыс атқарып, қажетті ақпаратты уақытында жеткізгенде ғана ортақ жұмыстың нәтижесі көрінеді. Руслан ұжымдағы өзара көмекті қауіпсіз әрі нәтижелі еңбектің маңызды шарты деп біледі. Кезінде өзі тәжірибелі мамандардан үйренсе, бүгінде жас қызметкерлерге де сол кеңесті айтады: жұмысты мұқият меңгеру, білмегенді сұрау және қауіпсіздік талаптарын естен шығармау. Он үш жыл ішінде жабдықтар да, жұмыс жүргізу тәсілдері де өзгерді. Сондықтан жинаған тәжірибеге сүйенумен қатар жаңа технологияларды меңгеру қажет. Руслан үшін кәсіби өсу қызметтің жоғарылауымен ғана өлшенбейді. Ол – күн сайын өз жұмысыңды жақсырақ түсіну, үйренуді жалғастыру және ортақ іске жауапкершілікпен қарау. «Ауысым соңында барлық жұмыс жоспар бойынша орындалып, ешқандай мәселе туындамаса, “бүгін жақсы жұмыс істедік” деп айтуға болады», - дейді ол. Осы қарапайым сөзде оның еңбекке деген көзқарасы жатыр. Жұмыстың қалыпты, қауіпсіз өтуі – күн бойғы мұқият еңбектің нәтижесі. «Мен үшін еңбек адамы – өз жұмысын адал әрі жауапкершілікпен атқаратын адам. Басты қағидам – жұмысты сапалы орындау, қауіпсіздікті сақтау және әріптестеріңе құрметпен қарау», - дейді Руслан. Он үш жылдық еңбек жолында машинисттен аға операторға дейін көтерілген Руслан Жұмахметов – бүгінде тәжірибесі толысқан, күш-қуаты кемел шағындағы еңбек адамы. Алда оны жаңа белестер күтіп тұр. Сол белестерге бастайтын тірегі – кәсібіне деген адалдығы мен күнделікті тиянақты еңбегі.