Атырау МӨЗ-дің экологиялық рұқсат алу жөніндегі қоғамдық тыңдаулары өтті деп танылды

Атмосфералық ауаны қорғау мәселесін талқылау кезінде Атырау МӨЗ үшін белгіленген шығарындылар лимитінің 2020 жылғы 20,1 мың тоннадан 2025 жылы 15,6 мың тоннаға дейін төмендегені атап өтілді. Жаңа экологиялық рұқсат аясында кәсіпорын 2026 – 2027 жылдарға жылына 15,3 мың тонна, ал 2028–2029 жылдарға жылына 15,2 мың тонна көлемінде шығарындылар лимитін сұратып отыр.

Атырау МӨЗ-дің экологиялық қызметіндегі басым бағыттардың бірі – су ресурстарын ұтымды пайдалану. 2026 жылға кәсіпорынның Жайық өзенінен тұщы су алу лимиті 11,9 млн м³, ал кейінгі үш жылға жыл сайын 12,4 млн м³ деңгейінде белгіленген. Осы кезең аралығында булану тоғандарына жіберілетін ағынды сулардың жылдық лимиті 8,6 млн м³ көлемінде көзделген. Бұл көрсеткіштер арнайы су пайдалануға берілген рұқсатта бекітілген. Нормативтер Қазақстан Республикасының табиғат қорғау және заңнама талаптарына сәйкес, сондай-ақ кәсіпорынның жобалық қуаты мен жұмыс режимі негізінде есептелді.
Тұщы су тұтынуды азайту мақсатында зауыт жыл сайын 258 мың м³ тазартылған ағынды суды қайта пайдалануды жоспарлап отыр. Айналымдағы су көлемі 2026 жылы 195 млн м³, ал 2027 – 2029 жылдары жыл сайын 200 млн м³-ді құрайды.

Атырау МӨЗ мамандарының айтуынша, кәсіпорын 2029 жылға қарай қалдықтардың жалпы көлемін 82 443 тоннадан 79 306 тоннаға дейін қысқартуды көздеп отыр.

2026 – 2029 жылдарға арналған табиғатты қорғау іс-шараларының жоспары аясында күкірт өндіру және ЭЛТҚ-АТ-2 қондырғыларындағы бу-конденсат жүйесін жаңғырту, санитарлық-қорғау аймағын көгалдандыру, бензин мен авиаотынды герметикалық құюға арналған сорғы станциясының құрылысын аяқтау, сондай-ақ қалдықтарды жинау және тасымалдау жүйесін жетілдіру жұмыстары қарастырылған.

«Қала тұрғындары үшін зауыттың табиғатты қорғау бағытында атқарып жатқан жұмыстары мен олардың нәтижелері туралы тұрақты ақпарат алып отыру маңызды. Олар экологиялық мәліметтермен және мониторинг нәтижелерімен танысып, олардың белгіленген нормативтерге сәйкестігін бағалай алуы тиіс. Біз ашық диалогқа дайынбыз, қажетті ақпаратты ұсынып, тұрғындардың сұрақтарына жауап беруге әзірміз. Мұндай өзара байланыс қоғамдық тыңдаулармен шектелмей, одан кейін де тұрақты түрде жалғасуы қажет», – деді Атырау МӨЗ бас директоры Мұратжан МҰСАЙБЕКОВ.

Сұрақ-жауап сессиясы барысында кәсіпорын мамандары экологиялық көрсеткіштер, қолданыстағы нормативтер мен жоспарланған жобаларды іске асыру мерзімдеріне қатысты түсініктеме берді.
Талқылау қорытындысы бойынша қоғамдық тыңдаулар өтті деп танылды.

«Атырау мұнай өңдеу зауыты» ЖШС баспасөз қызметі