Өндірістен сахнаға дейін: Атырау МӨЗ-де таланттар байқауы өтті

Іс-шараны ашқан Атырау МӨЗ бас директоры Мұратжан Мұсайбеков жиналғандарды келе жатқан кәсіби мерекелерімен құттықтап, отбасыларына амандық, мол табыс пен жаңа жетістіктер тіледі. Ол мұндай іс-шаралар қызметкерлердің шығармашылық қабілеттерін ашуға мүмкіндік беріп қана қоймай, ұжымдық рухты нығайтуға ықпал ететінін атап өтті.

«Күн сайын сіздер үздіксіз технологиялық процесті, энергиямен жабдықтауды, сапаны бақылауды, қауіпсіздікті, сондай-ақ зауыттың қаржылық және басқару жұмысын қамтамасыз етесіздер. Ал бүгін біз сіздерді мүлдем басқа қырларыңыздан көреміз. Зауыттағы көркемөнерпаздар байқауының игі дәстүрді сақтап қана қоймай, жыл сайын дамып келе жатқаны қуантады: жаңа ұжымдар құрылып, шығармашылықпен айналысуға жаңа мүмкіндіктер ашылуда. Бұл біздің ұжымда талантты, адамдардың көп екенін көрсетеді», – деді М. Мұсайбеков.

Байқауға қатысушылар өз өнерлерін ортаға салып, қазылар алқасы мен көрермен назарына вокалдық және хореографиялық қойылымдар, аспаптық шығармалар мен шағын сахналық көріністер ұсынды. Әр өнер көрсету қатысушылардың дайындығын, шығармашылық ізденісін және өз бөлімшесін лайықты таныстыруға деген ұмтылысын танытты.

Өнер сайысы жылы әрі достық атмосферада өтті. Көрермендер қатысушыларды қошеметпен қарсы алып, қызу қолдау көрсетіп, әрбір қойылымды қызығушылықпен тамашалады.

Іс-шара қорытындысы бойынша қазылар алқасы әр номинацияның жеңімпаздары мен жүлдегерлерін анықтап, оларға дипломдар мен ақшалай сыйақы табыстады.

«Атырау мұнай өңдеу зауыты» ЖШС баспасөз қызметі