Атырау МӨЗ-дегі балалық шақ мерекесі

Дәстүр бойынша алдымен кәсіпорын қызметкерлері «Шаңырақ» балалар ауылы мен жасөспірімдер үйіне, сондай-ақ тіл кемістігі бар балаларға арналған №3 арнайы мектеп-интернатына барып, тәрбиеленушілерді мерекемен құттықтады. Сөмкелер мен бейсболкалар сыйлап, зор денсаулық, қызықты демалыс пен жаңа жетістіктер тіледі.

Бұдан бөлек кәсіпорын қызметкерлерінің балалары арасында «Менің бақытты балалық шағым» тақырыбында сурет байқауы өтті. Сайысқа қатысқан 7–12 жас аралығындағы жас суретшілер өз туындыларында балалық шақтың ең жылы сәттерін, отбасы мен достарын, сүйікті істері мен асқақ армандарын бейнеледі. Суреттер жарқын бояуларымен, шынайылығымен және шығармашылық көзқарасымен ерекшеленді.

Мерекелік бағдарлама көңілді спорттық жарыстармен жалғасты. Балалар ептілік, жылдамдық және командада жұмыс істеу қабілеттерін көрсетіп, түрлі эстафеталар мен ойындарға белсенді қатысты. Қызықты сайыстар оларға көтеріңкі көңіл-күй сыйлап, ұмытылмас әсер қалдырды.

Сурет байқауы мен спорттық жарыстарға барлығы 100 бала қатысты. Іс-шара соңында жеңімпаздарға диплом, медаль және сыйлық сертификаты табысталды. 

Қызметкерлер мен олардың отбасыларын әлеуметтік қолдау – Атырау МӨЗ дамуының басым бағыттарының бірі. Кәсіпорын жыл сайын жұмысшылардың балалары үшін жазғы және қысқы сауықтыру лагерьлерін, мерекелік іс-шаралар және зауытқа танымдық экскурсиялар ұйымдастырады. Сонымен қатар жаңа оқу жылы қарсаңында қызметкерлерге балаларын мектепке дайындау үшін материалдық қолдау көрсетіледі.


«Атырау мұнай өңдеу зауыты» ЖШС баспасөз қызметі