Мұнай өңдеушілер Мемлекеттік рәміздер күнін атап өтті

Мерекелік рәсім Мемлекеттік Туды көтеруден басталды. Іс-шараға кәсіпорын басшылығы мен қызметкерлері қатысты. Кейін зауыт ұжымы Мемлекеттік Әнұранды бірлесіп орындап, елдің басты рәміздеріне құрмет көрсетті.

Атырау МӨЗ бас директоры Қуаныш Бишімов жиналғандарды мерекемен құттықтап, оның әрбір қазақстандық үшін айрықша маңызын атап өтті.

«Мемлекеттік Ту, Елтаңба және Әнұран еліміздің тарихын, тәуелсіздігі мен бірлігін айшықтайды. Олар бізді ортақ құндылықтар төңірегіне топтастырып, патриотизм мен Қазақстанның болашағы үшін жауапкершілік сезімін нығайтады. Атырау мұнай өңдеу зауыты күн сайын мемлекеттің дамуына және оның экономикалық қауіпсіздігін күшейтуге үлес қосып келеді. Кәсіпорын еліміздің үштен бірін қажетті мұнай өнімдерімен қамтамасыз етіп отыр. Бұл біз үшін үлкен жауапкершілік қана емес, сонымен қатар ерекше мақтаныш. Баршаңызға амандық, бақ-береке және ашық аспан тілеймін!» – деді Қуаныш Бишімов.

Қазақстан Республикасының Мемлекеттік рәміздер күні жыл сайын 4 маусымда аталып өтіледі. Айтулы мереке ұлттық бірлік, тәуелсіздік құндылықтары мен Отанға адал қызмет ету қағидаттарын дәріптейді.


«Атырау мұнай өңдеу зауыты» ЖШС баспасөз қызметі