Атырау МӨЗ-де химиктер күніне орай қызметкерлер марапатталды

Салтанатты жиын Н. Балғымбаев атындағы Коммуникацияларды дамыту орталығында өтті. Атырау МӨЗ бас директорының жалпы мәселелер жөніндегі орынбасары Сәлімжан Нақпаев алғысөзінде зауыт ұжымын кәсіби мерекемен құттықтап, кәсіпорын қызметіндегі химия өнеркәсібінің маңызды рөлін, сондай-ақ стратегиялық саланы дамытуға атсалысып жүрген мамандардың еңбегін ерекше атап өтті.

«Бүгінде Атырау мұнай өңдеу зауыты еліміздің мұнай-химия саласындағы негізгі өндіріс ошақтарының біріне айналып отыр. Кәсіпорынның тұрақты дамуы мен өндірістегі жоғары көрсеткіштері – әр қызметкердің қажырлы еңбегі мен кәсібилігінің нәтижесі. Сіздер күн сайын өндірістің үздіксіз әрі қауіпсіз жұмысын қамтамасыз етіп, саланың дамуына зор үлес қосып келесіздер. Әсіресе, күрделі технологиялық процестерді тиімді басқарып, сапалы өнім өндіру жолындағы еңбектеріңіз ерекше құрметке лайық. Кәсіпорынның жетістігі – бұл ең алдымен адамдардың еңбегі. Сондықтан сіздердің жауапкершіліктеріңіз бен адал қызметтеріңіз зауыттың дамуының берік негіз болып қала береді», – деді С.Нақпаев.

Салтанатты жиын барысында 23 қызметкер «ҚазМұнайГаз» ҰК АҚ Құрмет грамотасымен, естелік белгісімен және Алғыс хатымен, зауыттың кәсіподақ ұйымы атынан «Еңбек ардагері», «Мұнай-газ-химия саласын дамытуға қосқан үлесі үшін», «Химия өнеркәсібінің үздік қызметкері» медалдерімен және Құрмет грамотасымен марапаталды.

Сонымен қатар елімізде мамыр айында атап өтілетін Метрология қызметкерлері күні мен Байланыс қызметкерлері күніне орай 10 жұмысшы «ҚазМұнайГаз» ҰК АҚ Құрмет грамотасын иеленді.

Мерекелік шара жергілікті өнерпаздар мен зауыттың талантты қызметкерлері қатысқан концерттік бағдарламамен жалғасты.

Еске сала кетейік, өндірісті үш кезеңді ауқымды жаңғыртудан кейін мұнай-химия саласы Атырау мұнай өңдеу зауыты дамуының негізгі бағыттарының біріне айналды. 2015 жылы кәсіпорында хош иісті көмірсутектер өндірісі іске қосылды. Кешен отын және мұнай-химия режимдерінде жұмыс істейді. Отын режимі экологиялық таза жоғары октанды бензин компоненттерін өндіру үшін, ал мұнай-химия режимі бензол және параксилол өндіру мақсатында қолданылады.


«Атырау мұнай өңдеу зауыты» ЖШС баспасөз қызметі