«АМӨЗ» ЖШС бас директоры Ғалымжан Жусанбаев технологиялық жабдықтар мен құбырлардың өнеркәсіптік қауіпсіздігін техникалық куәландыру, тексеру және сараптау, реакторлық жабдықтардың катализаторларын ауыстыру бойынша жүргізіліп жатқан іс-шаралардың барысы туралы баяндады. Атмосфераға зиянды заттардың бөлінуін болдырмау мақсатында технологиялық жабдықтарды тазарту (булау жұмыстары) жабық жүйеде жүргізіледі. Жоспарлы алдын-алу жұмыстарына 2 мыңнан астам жұмысшы және 70-ке жуық арнайы техника жұмылдырылды.

Мұнай өнімдері жинақталған қор есебінен Энергетика министрлігімен келісілген жоспарға сәйкес жөнелтіледі. Жоспарлы алдын-алу жұмыстарының басында мұнай өнімдері қорының көлемі келесідегідей: автобензиндер – 30 мың тонна; дизель отыны – 15 мың тонна; әуе отыны – 6,5 мың тонна; сұйытылған газ – 500 тонна.

Зауыт қызметкерлерімен кездесуде Ә.Мағауов жоспарланған жұмыстарды белгіленген мерзім ішінде сапалы әрі қауіпсіздік техникасын сақтай отырып іске асырудың маңыздылығын атап өтті. ҚМГ Басқарма төрағасы А.Хасеновтің бұған дейін берген тапсырмасына сәйкес, зауыт басшылығы ұжымдағы әлеуметтік тұрақтылықты сақтап, жағымды атмосфераны қамтамасыз етуге ерекше назар аударуы керек. Сондай-ақ, кездесу барысында Атырау МӨЗ қызметіне қатысты бірқатар мәселелер, оның ішінде Tazalyq экологиялық жобасы да талқыланды.